ब्रेकिंग

वडगाव मावळमधील फार्म हाऊसवर हगवणे पिता-पुत्राचा मुक्काम

Wrutuja pandharpure
25 May 2025

पिंपरी : वैष्णवी मृत्यू प्रकरणात पाच जणांना अटक झालेली आहे. वैष्णवीचा सासरा राजेंद्र हगवणे आणि दीर सुशील हगवणे आठवडाभर फरारी होते. अटक टाळण्यासाठी त्यांनी पुणे जिल्ह्यासह कोल्हापूर आणि सातारापर्यंतचा प्रवास केला. सातारा जिल्ह्यातील पुसेगावात अमोल जाधव यांच्या शेतात ते काही वेळ थांबले होते. जाधव यांच्याकडे हगवणे यांचे शर्यतीचे बैल सांभाळायला असतात. तसेच, हगवणे पिता-पुत्र वडगाव मावळमध्ये एका फार्म हाऊसवरही मुक्कामाला होते हे समोर आले आहे.

यासंदर्भात अमोल जाधव म्हणाले, राजेंद्र हगवणे १९ तारखेला सायंकाळी साडेचारच्या सुमारास शेतात आले होते. ते १५ मिनिटेच थांबले. त्यावेळी पाऊस सुरु होता. आम्ही आंबे उतरवत होतो. ते आमच्याशी काही बोलले नाहीत. पण, ते घाबरलेले दिसत होते. त्यांची आणि माझी चुलत भावामुळे ओळख आहे. राजेंद्र हगवणे इतके का घाबरले आहेत? ते आम्हाला त्यावेळी समजले नाही. दुसर्‍या दिवशी आम्हाला वैष्णवीबद्दल समजले आणि त्यांच्या घाबरण्यामागचे कारण समजले, असे त्यांनी सांगितले.

वडगाव मावळमधील चिरोली-चांदोली गावचे सरपंच बंडू फाटक यांच्या फार्म हाऊसवर राजेंद्र हगवणे गेला होता, अशीदेखील माहिती समोर आली आहे. खुद्द या फार्म हाऊसचे मालक बंडू फाटक यांनी ही माहिती दिली आहे. १० ते १८ मे या कालावधीत मी घरातच होतो. १३ मे रोजी माझ्या मुलाचे लग्न झाले. त्यानंतर सत्यनारायण पूजा होती. त्यादिवशी बंडोपंत भेगडे यांचा मला फोन आला. हगवणे यांना तुमच्याशी बोलायचे असल्याचे भेगडे म्हणाले. तुमच्या फार्म हाऊसवर जाऊ का? अशी विचारणा हगवणे यांनी माझ्याकडे केली. मी मुलाच्या लग्नात व्यग्र होतो. घरी पाहुणे मंडळी होती. त्यामुळे मला बाहेर चाललेल्या गोष्टींची कल्पना नव्हती. हगवणे यांनी केलेल्या कृत्याबद्दल मी अनभिज्ञ होतो. घरी पाहुणे असल्याने भेगडे, हगवणे यांच्याशी बोलता आले नाही. पोलिसांनी चौकशीला बोलावले तर मी जाईन, असे त्यांनी सांगितले.